Հայաստանի հանգստավայրերը և առողջարանային քաղաքները

Ծաղկաձոր

Ծաղկաձորը Հայաստանի ամենամեծ լեռնադահուկային հանգստավայրն է, որը գտնվում է համանուն քաղաքում՝ Երևանից 50 կմ հեռավորության վրա։ Ժամանակին այն փոքր բնակավայր է եղել, ապա խորհրդային տարիներին դարձել սպորտային կենտրոն։ Այստեղ կառուցվել է սպորտ բազա՝ Մեխիկոյում անցկացվելիք Օլիմպիական խաղերին մարզիկներին պատրաստելու նպատակով:

Ծաղկաձորի ընտրությունը պատահական չէր. այն գտնվում է ծովի մակարդակից 2000 մ բարձրության վրա, իսկ Մեխիկոն՝ 2240 մ բարձրության վրա: Դա թույլ էր տալիս մարզիկներին պատրաստվել օլիմպիականներին մոտ պայմաններում։ Իսկ 1986թ.-ին սպորտային համալիրին կից հայտնվեց լեռնադահուկային հանգստավայր։

Այսօր Ծաղկաձորում հիանալի պայմաններ կան լեռնադահուկային սպորտի, դահուկավազքի, սնոուբորդի, ինչպես նաև էքստրեմալ հանգստի սիրահարների համար։ Իսկ լեռնադահուկային հանգստավայրի լանջերից բացվում է գեղատեսիլ տեսարան դեպի Արարատ լեռը և Սևանա լիճը:

Ծաղկաձոր լեռնադահուկային հանգստավայրի առանձնահատկություններն են՝

• Ծաղկաձորում լեռնադահուկային սեզոնը տևում է դեկտեմբերի կեսից մինչև ապրիլ ամիսը;
• հանգստավայրն ունի երեք մակարդակի 15 ուղի, լանջի առավելագույն երկարությունը 8 կմ է, իսկ բարձրությունների տարբերությունը կազմում է 853 մ;
• սահքի ամենաբարձր կետը 2819 մ է;
• Ծաղկաձորում ձմռան միջին ջերմաստիճանն ընդամենը -5 ℃ է;
• հանգստավայրում գերակշռում են արևոտ օրերը` ձմռանը դրանք 75% են կազմում:

Դահուկներով սահելուց հետո զբոսաշրջիկները կարող են վայելել մի շարք զվարճանքներ՝ ռեստորաններ, բարեր, սաունաներ և, նույնիսկ, կազինո: Հատուկ ուշադրության է արժանի էքսկուրսիոն ծրագիրը։ Ծաղկաձորում զբոսաշրջիկները կարող են տեսնել 11-րդ դարի Կեչառիս վանքը, այցելել Օրբելի եղբայրների տուն-թանգարան, էքսկուրսիա գնալ Հրազդան քաղաք։

Ծաղկաձորը գրավիչ է զբոսաշրջիկների համար նաև ամռանը։ Այստեղ կարելի է հիանալ բնության տեսարաններով, բարձրանալ Թեղենիս լեռան գագաթը և զիփլայն նստել: Ի դեպ, Ծաղկաձոր բառացի նշանակում է «ծաղիկների ձոր»: Ամռանը պարզ է դառնում, թե ինչու. ձյունածածկ գագաթների տեսարանին ծաղկած հովիտը, իսկապես, շատ տպավորիչ է:

Հուլիսին և օգոստոսին, երբ Երևանում արդեն չափազանց շոգ է, Ծաղկաձորում կարելի է հանգստանալ ամռան տապից. այստեղ ջերմաստիճանը տատանվում է +23-ից +25 ℃: Այդ պատճառով այստեղ են գալիս և տեղացիները, և Հայաստանի հյուրերը։

Ծաղկաձոր

Ծաղկաձորի ճոպանուղու երկրորդ կայանը

Սևան

Սևանը Կովկասի ամենամեծ լճի անունը կրող քաղաք և հանգստավայր է, որը գտնվում է ծովի մակարդակից 1900 մ բարձրության վրա։ Լճի ջրերն այնքան մաքուր են, որ, ըստ լեգենդի, հին ժամանակներում աստվածները ջուր են վերցրել միջից։

Սևանը զբոսաշրջիկների համար հետաքրքիր է ողջ տարի։ Ամռանը լճի ափը վերածվում է Հայաստանի ամենամեծ լողափնյա հանգստավայրի։ Իսկ ձմռանը մոտակա լեռան լանջին գործում է լեռնադահուկային համալիր։

Ամռանը Սևանում կայուն արևոտ և տաք եղանակ է՝ +20/+24 ℃ օդի միջին ջերմաստիճանով։ Լճում ջուրը տաքանում է մինչև +22/+24 ℃, դա հարմար ջերմաստիճան է լողալու համար:

1. Մաքուր լողափերով: Սևանն ունի ավազոտ և մանր խճաքարային լողափեր։ Բազմաթիվ հյուրանոցային համալիրներում կան հատուկ լողափնյա տարածքներ՝ հովանոցներով և շեզլոնգներով:
2. Ջրային սպորտով: Սևանում կարելի է նստել զբոսանավ, կատամարան, սկուտեր, ինչպես նաև զբաղվել սապբորդինգով և ջրային դահուկների սպորտով: Ափին կա առագաստանավային ակումբ, որտեղից հնարավոր է վարձել համապատասխան պարագաները և, նույնսիսկ, վինդսերֆինգի դասեր պատվիրել։
3. Ժամանցով: Լճի ափին կա ջրաշխարհ, գործում են սրճարաններ և բարեր։ Իսկ «Սպիտակ Շորժա» լողափում անցկացվում են ամառային մասշտաբային միջոցառումներ։

Սևանում ձմեռը չափավոր ցուրտ է: Օդի միջին ջերմաստիճանը՝ -10 ℃։ Դեկտեմբերից մարտ ընկած ժամանակահատվածում լեռները պատված են լինում ձնածածկով: Այս ամենը հարմար պայմաններ է ստեղծում լեռնադահուկային սպորտով զբաղվելու համար։

Սևան լեռնադահուկային հանգստավայրն իր չափերով զիջում է Ծաղկաձորին.

• այն համալրված է սկսնակ դահուկորդների համար նախատեսված լանջով, 2 կմ երկարությամբ գալարապտույտ ճանապարհով, ինչպես նաև 1.2 կմ երկարությամբ տարածքով, որը միայն հմուտ սահողների համար է;
• բարձրությունների տարբերությունը կազմում է 400 մ;
• լանջերը գտնվում են ծովի մակարդակից 2000-ից 2600 մ բարձրության վրա։

Սևան հանգստավայրն ունի զբոսաշրջային զարգացած ենթակառուցվածք։ Այստեղ կան բազմաթիվ հյուրանոցներ, գեղեցկության սրահներ, սաունաներ, լողավազաններ, ձիասպորտի ակումբ, ինչպես նաև թենիսի կորտ:

Սևանա լճի ափին և թերակղզում կան մի քանի հետաքրքիր տեսարժան վայրեր: Այստեղ է գտնվում 9-րդ դարի Սևանավանքը, Վազգենյան հոգևոր ճեմարանը և Հայրավանքը: Այստեղ հանգստանալիս կարող եք այցելել նաև Դիլիջանը և բարձրանալ Արտանիշ լեռան գագաթը։

Սևանա լճի տեսարանը՝ թռչնի թռիչքի բարձրությունից

Դիլիջան

«Միմինո» ֆիլմի շնորհիվ Դիլիջանը ռուս զբոսաշրջիկների շրջանում Հայաստանի ամենահայտնի հանգստավայրն է։ Այն գտնվում է լեռնային հովտում՝ ծովի մակարդակից 1200-1500 մ բարձրության վրա և շրջապատված է Դիլիջանի արգելոցով։ Դիլիջանը գրավում է նաև էքսկուրսային հանգստի սիրահարներին: Այստեղ կարելի է ուսումնասիրել՝

1. «Միմինո» ֆիլմի հերոսների հուշարձանը: Գտնվում է քաղաքի կենտրոնում և հանդիսանում տարբեր ազգերի միջև բարեկամության խորհրդանիշը։ Ի դեպ, ֆիլմի հերոսները՝ Միզանդարին, Խաչիկյանն ու Վոլոխովը, կանգնած են ծորակի մոտ, որտեղից հոսում է այն նույն ջուրը, որն աշխարհում երկրորդ տեղն է զբաղեցնում (ֆիլմից հայտնի արտահայտություն)։ Յուրաքանչյուր ոք կարող է խմել այն:
2. Դիլիջանի պատմական թաղամասը: Այն կենտրոնական թաղամաս է՝ հին ժամանակների ոճով ձևավորված փողոց։ Քայլելով քարապատ մայթի երկայնքով՝ կարելի է տեսնել փորագրված պատշգամբներ, սալիկապատ տանիքներ, ինչպես նաև ձեռագործ զարդարված պատուհանների շրջանակներ: Շենքերի առաջին հարկերում գործում են արհեստանոցներ։
3. 12-13-րդ դդ.-ի Ջուխտակ վանքը: Այն գտնվում է Դիլիջանից 3 կմ հեռավորության վրա։ Բաղկացած է 2 եկեղեցուց, որոնք վեր են խոյանում անտառապատ լանջին։

Դիլիջանն առաջարկում է հիանալի պայմաններ արշավների, քայլարշավների և հեծանվավազքի համար: Զբոսաշրջիկները հնարավորություն ունեն արշավի գնալ դեպի Հաղարծին վանք, արահետով քայլել դեպի Խանջյան վիլլայի ավերակները, ինչպես նաև լեռնային ճանապարհներով հեծանիվ վարել։ Ակտիվ հանգստի սիրահարները կարող են պարապլան նստել, կամ զբաղվել ձիավարությամբ:

Դիլիջանի պատմական թաղամասը

«Միմինո» ֆիլմի հերոսների հուշարձանը Դիլիջանում

Ջերմուկ

Ջերմուկը բալնեոլոգիական, կլիմայական և լեռնադահուկային հանգստավայր է Հայաստանում։ Այն գտնվում է ծովի մակարդակից 2100 մ բարձրության վրա, երեք կողմից շրջապատված է լեռներով և Արփա գետի կիրճով բաժանված է երկու մասի։ Ավանդաբար դրանցից մեկը համարվում է բնակելի մաս, իսկ մյուսը՝ հանգստավայր։

1. Բնությամբ: Այստեղ է գտնվում Հայաստանի երկրորդ ամենաբարձր ջրվեժը։ Նրա ջրերը թափվում են 68 մ բարձրությունից: Առողջարանի շրջակայքում կան ավելի քան 500 գեյզերներ և աղբյուրներ։ Զբոսաշրջիկները կարող են հիանալ լեռնային տեսարաններով և Արփա գետի կիրճով։
2. Հանքային ջրերով: Քաղաքում կառուցվել է հանքային ջրերի պատկերասրահ: Այստեղ ջուրը մատակարարվում է թվով հինգ աղբյուրներից։ Ջերմաստիճանը 33-ից 56 ℃ է։ Ջուրն ունի բուժիչ հատկություններ և օգնում է մարսողական օրգանների, լյարդի, նյութափոխանակության, նյարդային համակարգի խանգարումների դեպքում։
3. Ջերմային աղբյուրներով: Ջերմուկը հայտնի է սպա կենտրոններով և բնական աղբյուրներով, որոնցում կարելի է լողալ ամբողջ տարին։
4. Տեսարժան վայրերով: Ջերմուկում և նրա շրջակայքում կարելի է այցելել 10-րդ դարի քարանձավային-վանական համալիր Գնդեվանքը, 2010թ.-ին կառուցված Սբ. Գայանե եկեղեցին և Կեչուտի տպավորիչ ջրամբարը, որը գտնվում է քաղաքից ընդամենը 10 կմ հեռավորության վրա։
5. Ակտիվ հանգստով: Հանգստավայրն ունի լայն հնարավորություններ հեծանվավազքի, թրեքինգների և արշավների համար: Այստեղ կան մի քանի արահետներ, որոնք զբոսաշրջիկներին տանում են դեպի դիտահարթակներ։
6. Փառատոններով: Ջերմուկում անցկացվում են բազմաթիվ փառատոններ՝ երաժշտական, գինու, հանքային ջրերի, լեռնային։ Դրանք թույլ են տալիս ծանոթանալ Հայաստանի ավանդույթներին ու մշակույթին։
7. Ճոպանուղով: Հանգստավայրի ճոպանուղին զբոսաշրջիկներին հասցնում է 2450 մ բարձրության վրա, որտեղից բացվում են անհավանական լեռնային տեսարաններ:

2007թ.-ին Ջերմուկում լեռնադահուկային սահուղիներ կահավորելու որոշում կայացվեց: Այսպիսով, ներկայումս՝ ձմռան շրջանում, ի թիվս այլ զբաղմունքների, այստեղ հնարավոր է նաև զբաղվել լեռնադահուկային սպորտով: Գործում է 2 արահետ՝ սկսնակների և փորձառու մարզիկների համար: Դրանց երկարությունը 3 կմ է։ Բարձրությունների տարբերությունը կազմում է 338 մ:

Ջերմուկն ունի հանգստի համար անհրաժեշտ բոլոր ենթակառուցվածքները։ Այստեղ կան մի քանի առողջարաններ, տարբեր մակարդակի հյուրանոցներ, սրճարաններ, ռեստորաններ։ Հանգստավայրի հյուրերը կարող են այցելել սպա կենտրոններ և սաունաներ:

Ջերմուկ

Ջերմուկի ջրվեժ

Աղվերան

Աղվերանը հայկական կլիմայական հանգստավայր է, որն ընդունում է զբոսաշրջիկներին ողջ տարին: Այն հարմար է խաղաղ հանգիստ անցկացնելու համար, այստեղ հնարավորություն կա վայելել մաքուր օդը և հիանալ լեռնային տեսարաններով։

Աղվերանը գտնվում է Երևանից ընդամենը 55 կմ հեռավորության վրա՝ ծովի մակարդակից 1550 մ բարձրության վրա՝ Դալար գետի վրա։ Նման դիրքի շնորհիվ եղանակն Աղվերանում մշտապես կայուն է. ամռանն այստեղ ծայրահեղ շոգ չի լինում, իսկ ձմռանը ջերմաստիճանը չի իջնում -7 ℃-ից: Քանի որ Աղվերանը համարվում է բուժիչ հանգստավայր, այստեղ կան բազմաթիվ առողջարաններ։ Նրանք առաջարկում են կեցություն, երեքանգամյա սնունդ, բժշկական խորհրդատվություն, ինչպես նաև առողջարարական պրոցեդուրաներ:

Այն զբոսաշրջիկները, որոնք բուժման կարիք չունեն, կարող են օգտվել հանգստավայրի տարբեր կարգի հյուրանոցներից։ Դրանցից մի քանիսը հագեցած են լողավազաններով, սպա կենտրոններով, մարզադահլիճներով, թենիսի կորտերով, ռեստորաններով և առաջարկում են տարբեր զվարճանքներ։

«Պարկ Ռեզորթ Աղվերան հյուրանոց»-ում կարող եք ամրագրում կատարել և օգտվել ռուսական բաղնիքից: Հյուրանոցում գործում է նաև պարանային «Պանդ պարկ»-ը՝ մեծերի և երեխաների համար նախատեսված ուղիներով:

Հանգստավայրի շրջակայքում կան բնական տեսարժան վայրեր։ Դրանցից մեկը Ծաղկունյաց լեռներն են, որոնց լանջին գտնվում է անձրևաջրերով լցվող լեռնային գեղատեսիլ լիճ:

Աղվերան

Վանաձոր

Վանաձորը հայկական մեկ այլ բալնեոլոգիական հանգստավայր է, որը մասնագիտացած է ջրային բուժության և ցեխաբուժության մեջ: Առանձնահատկություններն են՝

• Բնությունը: Քաղաք-հանգստավայրը գտնվում է Փամբակի և Բազումի լեռնաշղթաներով շրջապատված Վանաձորի բարձրավանդակում՝ Փամբակ, Տանձուտ և Վանաձոր գետերի միախառնման տեղում:
• Բուժումը: Վանաձորում գործում են մի քանի առողջարաններ, որոնք առաջարկում են ջրային բուժություն և ցեխաբուժություն: Այստեղ բուժում են հենաշարժական, մարսողական, շնչառական, սրտանոթային, նյարդային և էնդոկրին համակարգերի հիվանդություններ։
• Ժամանցը: Վանաձորը Հայաստանի մեծությամբ երրորդ քաղաքն է։ Քաղաքի հյուրերը կարող են այցելել Ազգային պատկերասրահ և Պետական ​​դրամատիկական թատրոն: Հանգստավայրում կան բազմաթիվ սրճարաններ և ռեստորաններ:

Բացի այդ, այստեղ հանգստացող մարդիկ կարող են կազմել հետաքրքիր էքսկուրսիոն ծրագիր: Նրանք հնարավորություն ունեն այցելելու Քոբայրի վանքի ավերակները, որի պատերը զարդարված են հնագույն որմնանկարներով, ՅՈՒՆԵՍԿՕ-ի Համաշխարհային մշակութային ժառանգության ցանկում ընդգրկված Սանահինի և Հաղպատի վանքերը, ինչպես նաև Սանահինի կամուրջը։

Հաղպատի վանքը՝ Վանաձորից ոչ հեռու

Քոբայրի վանքը