Արա լեռան հարավային մասում կա քարանձավային սրբավայր՝ նվիրված Սուրբ Վարվառային: Այն ուխտագնացության հայտնի վայրերից մեկն է: Վանքի հետ կապված երկու ավանդություն կա: Համաձայն առաջինի՝ Սուրբ Վարվառան, փորձելով փախչել իր դաժան հորից, ով ցանկանում էր սպանել նրան քրիստոնեություն դավանելու համար, թաքնվում է քարանձավներում: Մինչև նահատակվելը, Վարվառան Աստծուց խնդրում է, որ այդ պահից սկսած ծաղիկ և կարմրուկ հիվանդություններ ունեցող երեխաները բժշկվեն իր անունով, և Աստված իր համաձայնությունն է տալիս: Ըստ մյուս ավանդազրույցի՝ իշխանը փորձել է բռնի ուժով տիրանալ գեղեցկուհի Ծաղիկին: Վերջինս, փախչելով նրանից, թաքնվել է Արա լեռան քարանձավում: Որոշ ժամանակ անց, կորցնելով փրկվելու հույսը, Ծաղիկը բարձրացել է ժայռի վրա և ցած նետվել: Համարվում է, որ այն ջուրը, որ ներկայումս հոսում է քարայրի առաստաղից, նահատակ կույսի արցունքներն են, որոնք օժտված են բուժիչ հատկություններով:
