Հարթագյուղի մոտակայքում՝ Փամբակ լեռնաշղթայի դժվարամատչելի բարձունքներից մեկի վրա տեղակայված Սբ. Հովհաննես մատուռը վերջերս դարձել է ուխտագնացության ամենասիրելի վայրը: Ըստ ավանդության՝ այս մատուռի տեղում են թաղված Սուրբ Հովհաննեսի մասունքները: Ծովի մակարդակից 2157 մ բարձրության վրա գտնվող այս սրբավայր հասնելը բավականին դժվար է. հարկավոր է անցնել ~3 կմ ոտքի ճանապարհ, ինչի համար պահանջվում է մոտ 1.5 ժամ: Բայց երբ այնտեղ հասնեք, կհասկանաք, որ միանշանակ արժեր այդքան ջանք գործադրել: Ասում են, որ սրբավայրը հավատացյալներին շնորհում է իղձերի կատարում, և ամեն անգամ, երբ դրանք իրականանում են, մարդիկ այստեղ խաչքար են բերում՝ ի նշան գոհունակության: Այս ամենի արդյունքում մատուռը ներկայումս շրջապատված է հարյուրավոր խաչքարներով: