Վայոց Ձորի Եղեգիս գյուղից ոչ շատ հեռու՝ լեռների վրա է գտնվում Ցաղաց Քար վանական համալիրը: Այն բաղկացած է երկու խումբ կառույցներից: Արևմտյան խմբի շենքերը կառուցվել են 10-րդ դարում և այժմ խիստ վնասված են: Բավականին լավ է պահպանվել արևելյան խումբը, որը կառուցվել է 11-րդ դարում: Այս խմբի գլխավոր եկեղեցու հյուսիսային պատի բարձրաքանդակն իր տեսակի մեջ ամենամեծն է Հայաստանում: Եկեղեցուց քիչ դեպի արևելք կառուցված է երկհարկանի մատուռ-դամբարանը, որի մուտքի երկու կողմերում կան խաչքարեր՝ կերտված արվեստի բարձր սկզբունքներով: