Սյունաց աշխարհի նշանավոր վանքերից էր Թանահատի վանքը, որը կառուցված է գեղատեսիլ մի լեռնաճյուղի վրա: Այս համալիրը մեծ հռչակ ուներ հատկապես 13-14-րդ դարերում, քանի որ ենթադրվում է, որ այստեղ էր գտնվում Հայաստանի բարձրագույն դպրոցներից մեկը՝ Գլաձորի համալսարանը: Այն մի վարդապետարան էր, որտեղ գործում էին ժամանակի ամենահայտնի գիտնականները և որի շրջանավարտները հոգևոր բնագավառից բացի զբաղվում էին նաև գիտությամբ ու մատենագրությամբ: Գլաձորում էր գտնվում նկարչության դպրոցը, որը, հենվելով անցյալի ավանդույթների վրա, իր ուրույն ձևով ներկայացրեց հայ մանրանկարչությունը: