Վաղ միջնադարում Աղիտուն իր քաղաքական, կրոնական, ռազմական ու տնտեսական ազդեցությամբ եղել է Սյունիքի առաջին բնակավայրերից մեկը: Այն հայտնի է իր հռչակավոր հուշակոթողով՝ կառուցված 6-7-րդ դարերում: Հուշարձանի քանդակները շատ նման են Զվարթնոցի տաճարի քանդակներին, դրանց վրա կարելի է տեսնել նաև քարե արձանագրություններ: Աղիտուի հուշակոթողը Հայաստանում պահպանված հազվագյուտ մահարձաններից է: Հատկանշական է, որ Սարդարապատի հուշահամալիրի զանգակատների կամարներն ընդօրինակված են Աղիտուի մահարձանից: Ըստ վարկածներից մեկի՝ սա քրիստոնեական հավատքի համար նահատակվածների դամբարան է: