Ուղտասարը գտնվում է Սյունիքի մարզում՝ ծովի մակարդակից 3000-3300 մ բարձրության վրա: Լեռան մոտ կա մի փոքրիկ լիճ՝ Ուղտալիճ անունով՝ շրջապատված բազմաթիվ ժայռապատկերներով, որոնք Հայաստանի նախնադարյան արվեստի ժառանգության մեջ իրենց առանձնահատուկ տեղն ունեն: Ուղտի նման սապատավոր այս լեռան վրա նախնադարյան մարդը պատկերագրել է իր միտքն ու առօրյան: Ժայռապատկերներն ունեն խիստ բազմազան բովանդակություն ու հարուստ թեմատիկա: Այդ հնօրյա քարե կտավների վրա իրենց անդրադարձումն են գտել որսորդական, պաշտամունքային, տիեզերական պատկերացումների հետ կապված տեսարանները: Ուղտասարի ժայռապատկերներում ներկայացված են Հայաստանի բնությունն ու կենդանական աշխարհը` իրենց ողջ հարստությամբ: Զարմանալի է նախնադարյան նկարչի դրսևորած վարպետությունը կենդանիների պատկերման մեջ՝ ճշգրտորեն վերարտադրվել են նրանց մարմնի համաչափություններն ու շարժման պլաստիկան: Ապշեցուցիչ է նաև աշխատանքի տեխնիկան: Պատկերներն արված են ժայռերի հարթ մակերևույթներին` 2-6 մմ խորությամբ և 2-21 մմ լայնությամբ: Ըստ կատարման տեխնիկայի և ոճի` ժայռապատկերները թվագրվում են մ.թ.ա. 5-2-րդ հազարամյակներով:
Լեռ հնարավոր է հասնել միայն 4x4 ամենագնացներով:
